20261112
≪窮生説≫
香港首個大型成人展 MEGA FANS EXPO，原定13至15號喺富豪機場酒店舉行，近30位日本女優來港，飛機落咗地，部分人甚至話事前已經辦理相關簽證，最後都係有人被拒入境，成個活動開幕前48小時直接取消。
我對成人展本身冇乜特別立場。
你覺得香港唔適合搞，完全可以。
但如果係咁，day one就講清楚唔准搞。
最怕係人哋租咗場、請咗人、賣咗飛、做晒宣傳，日本嘉賓都飛到香港，去到最後一刻先發現原來做唔到。
因為做盛事最值錢嘅其實唔係政府派幾多補貼，係「可預期」。
主辦方計budget、外國藝人排期、酒店場地留檔期、贊助商落錢，全部都係幾個月前決定。如果規則係清楚嘅，你話成人活動唔批，大家咪唔搞。
商業上最怕係「可能得」。但香港最興就係咁，因為方便管理呀嘛！一句，我無話俾你做喎！就收你檔。
你可以燒幾百萬落去，到最後先知道得唔得。呢啲生意真係你做埋我果份。
而且今次影響唔止成人展。海外主辦方睇新聞唔會理你今次題材有幾敏感，佢只會諗呢個地方，活動批咗、宣傳出咗、飛賣咗之後，仲有冇機會臨門一腳出事？
如果答案係有，下次做演唱會、動漫展、電競、粉絲見面會，風險premium自然就會高。
盛事經濟唔係淨係靠政府自己揀幾個「正氣」event返嚟。
真正做到盛事城市，係外面啲人覺得你個市場值得落錢，而且規則穩定，先會自己帶活動入嚟。
所以我唔係話香港一定要搞成人展。
我只係覺得，政策尺度可以保守，保守到伊朗咁其實都唔係問題，但規則唔可以曖昧。
香港想做盛事？ 發明咗時光機可能得嘅。
沒有留言:
發佈留言