媽媽的神奇小子 香港運動員

https://www.facebook.com/photo/?fbid=391964029305814&set=a.110763407425879 

媽，我現在不是運動員了

「媽，我現在不是運動員了，我是一名速遞員。」
「如果你唔跑，其他人會睇你唔起。」「而家係我自己睇唔起我自己。」

電影「媽媽的神奇小子」當中充滿催淚彈，令我由片頭喊到片尾。
「我做速遞員每個月有$8000人工，我返去做運動員，得$3000咋。」
看到片中的男主角的遭遇，令我感同身受以外。最催淚的其實是諗起自己做運動員連$3000資助都未試過拎。對啊，可以在奧運會當中拿得獎牌，當然付出了很多的努力。但更現實的是「一將功成萬骨枯。」其實有更多的運動員也同樣付出了很多很多的努力，但是最後不但去不到奧運，連$3000資助也沒有。那麼這些運動員又有誰知道？諗諗吓我好似就是其中一份子。
其實一開始就已經知道喺香港做運動員係搵唔到錢，由我10歲開始打排球，直到我30歲出事， 20年嘅排球生涯媽媽都一直叫我唔好再堅持落去，但係我認為排球就係我自己喜歡要做嘅事，所以希望一直堅持打排球嘅同時可以維持屋企嘅生活，等屋企人可以唔使擔心自己。所以最後選擇左老師嘅工作，一方面可以仲有機會兼顧自己香港隊嘅訓練同埋外出比賽，同一時間亦都可以將自己所學嘅排球技術教俾下一代。

講出嚟大家都可能未必信，其實我竟然都曾經試過比泰國職業聯賽嘅隊伍邀請過去打職業聯賽。但係當時啱啱出嚟做嘢冇幾耐，屋企環境都唔係話十分之好，真係唔能夠放棄老師嘅工作，去到泰國賺果幾千蚊港幣嘅人工。追夢嘅過程當然係好浪漫，亦都會帶嚟好多嘅注意力。「香港第一個外出打職業聯賽嘅排球員」嘩！聽起上嚟都威，但係威風過後又如何？始終都要解決生計問題，自己知自己事，因為身高和體格嘅關係，可以爬上職業聯賽嘅頂峰，賺取球星嘅工資，機會係微乎其微，而背後所付出嘅代價，可能就係要長期病患嘅父母外出工作。咁樣你會點樣選擇？係呀，如果我真係揀咗不顧一切咁樣外出追夢，我真係會好睇唔起我自己。

但係我又真係好想打排球喎，咁點算呢？
之後就係地獄式嘅時間表，每日6:00起身，大約 7:00返到學校，開始準備日常嘅教學工作，喺午息時間一路食飯一路望住學生猜波，放咗學再同學生訓練，學生練完波之後，返埋位改簿，做行政工作， 6:45 PM校工要鎖門，然後我就出發去練習或者去健身室做體能（有段時間仲去左中大進修），喺交通嘅過程當中完成自己嘅晚餐，夜晚12點左右返到屋企瞓覺，如是者維持左五年。直到我被捕嗰一日，我個背囊都依然係帶着練習嘅衫褲。喺醫院嗰度律師問我有冇啲咩說話要幫忙轉達，我話我今晚應該練唔到波。下星期係菲律賓嘅比賽都應該去唔到。

今日，唔單止冇得教書，即使喺本地積分排行榜依然係前列，有資格代表香港，但係根本冇可能外出比賽。更加唔好講$3000嘅資助，你叫我點樣可以睇呢套戲嘅時候唔喊呢？

講出嚟唔係要大家可憐我，亦都唔需要因為可憐我而subscribe 我個Patreon ，只係如果你呢排因為放榜成績唔理想，或者入唔到心儀嘅大學，又或者因為港青選拔落選左而唔開心，你可以選擇睇吓我嘅故事，我想話俾你知，我依家每日都仲係好努力地工作同鍛鍊自己，已經跌得咁甘，其實仲有幾多時間比自己唔開心？雖然未必再有機會可以用運動員嘅身份代表香港，但係運動員嘅心態，我絕對唔會放棄。

二十年過去，依家終於都可以同啊媽講，「媽，我唔做運動員了。」
@zerotoherofilm
#媽媽的神奇小子
#香港運動員
#奧運
#殘奧
#運動員
#完