【某幾個區只會愈來愈冷清，香港人亦會愈來愈抑鬱】史健仁

 

史健仁 20250504

【某幾個區只會愈來愈冷清，香港人亦會愈來愈抑鬱】

你降低訪港陸客要求，R爛腳R四五線城市嘅低檔自由行旅客過嚟，冇錯係會谷大訪港旅客嘅數字，話唔定破某某紀錄之後，又同比增長幾多成。將呢批數字擺係主子面前，講嘢個陣頭都抬高啲。

之不過，你用低質客谷數，一定會搞到香港各處烏煙瘴氣，甚至會有一陣「陸除」（註1）。以前黃金周人流都好爆，但並冇太影響香港居民嘅生活，因為個班陸客主要係遊客區活動，塞都係塞個度。而家好多陸客對香港已經非常熟路，一個二個都變窮遊（人之常情），有錢少少嘅，睇個標價唔窮遊都變窮遊，最終大大影響緊居民嘅生活。呢幾日大家樂大快活老麥塞到爆，超市及公園都超多人。一家大細帶住對仔女，諗住避開市中心人流到郊外啦，點知到郊外條路塞到爆！

黃金周完，窮遊撚走咗啦，過去呢個星期你個場爆晒人流喎（註2），咁業主就可能會加租，然後零售食肆又會跟住加價，呢個就係香港人最熟悉嘅「港式惡性循環」。

R一大堆低檔，唔過夜唔消費息嘅旅客嚟「谷數」，唔單止影響居民生活，個場被低檔客搞到烏煙瘴氣，亂七八遭，會打擊高消費旅客嘅消費意欲，最終會得不嘗失。一個高檔旅客行開嘅場，降價去吸引中低消費嘅客係唔會影響商場或品牌嘅格，但要將一個比低檔客塞開嘅場升格去吸引中高檔客，就難過登天。

香港居民長年累月谷住一肚氣，開始覺得每到週末及假期就唔應該去香港某幾個區域。只要呢種一時三刻嘅諗法經過時間累積，繼而變成觀念嘅話就死得，因為由有時間加持嘅觀念係好難一時三刻被扭返正，呢個亦係愈來愈多香港人提唔起勁去香港幾個區域行街睇嘢嘅主要原因。

只要香港政府官員，議員，旅遊業，飲食零售業人士繼續咁短視，某幾個區域只會愈來愈冷清，香港人亦會愈來愈鍾意收埋自己，有啲仲會愈來愈抑鬱。放心，香港係唔會死，港人心跳，呼吸，血壓及血糖都會正常，但反應係會愈來愈遲鈍。Mark my words here。

________

註1：我唔係幾想咁講，但事實上低檔客匯聚真係會有呢陣味。經常返大陸玩或要返大陸睇廠嘅朋友，應該會明我講乜。

註2：事實係呢幾日賺到嘅，可能極其量只夠cover呢個月條數，上兩個月都係負數呀屌你老味。