鄧局長重新定義法治成特首大熱 葉一知

 

葉一知

20260413

鄧炳強局長在最近的電視訪問中，提出很新穎的法治想法。第一個是拘捕而未被檢控的人要接受更生，即「沒有定罪卻要接受更生」，又即「警察拘捕即定罪」，這樣大膽的想法，已夠別開新面。

更令人佩服的，是提出「不會列出禁書名單」，理據是：「列出嚟只會便利犯法，啲賊就開心喇，改書名就唔係黑名單，你拉我唔到喎，我冇理由咁蠢做啲嘢令自己執法冇咁有效率㗎嘛。」

局長梗係唔蠢，只係我哋啲蟻民蠢，就有好多嘢唔明，包括：

1. 你將一堆人列為通緝犯，咁佢哋咪好開心？佢哋轉頭改個名就唔係被通緝，許智峯改名做許士仁，你咪呢世拉佢唔到？

2. 太空油俾你改咗名做依托咪酯，唔通佢就唔係毒品？你列出依托咪酯係違禁，毒販私下將佢改叫「蛋餅油」，咁你咪拉唔到啲毒犯？

3. 即係出版社將《黎智英傳》改名做《肥佬黎傳》，原來就唔會變禁書？原來係個書名被禁而唔係內容？

4. 香港印書好貴，又難賺錢，本書俾你列為禁書，改名重新印過然後再被你禁一次，書商冇理由咁蠢信你，自己再賠本一次係嘛？

5. 我所認識嘅法律，係用來保障市民嘅福祉，好嘅法律係唔會令市民容易誤墮法網，而唔係令執法更有效率，以檢控快靚正多嚟做標準去跑數，對嗎？你想有效率，修訂國安法，列明「阿sir話你犯法就犯法」，律師、法庭無權話事，咪最有效率——其實依家都已經勁有效率㗎啦。

鄧局長係下屆特首大熱，依家提出兩大法治大改革，贏面很高。「我冇咁蠢」相信可以用嚟做挑戰李家超嘅政綱口號，希望你得償所願啦。