“再見UFO”其實喺2018年5月就開拍

 Ray Iu文人多說話

20260325

我已經好耐冇認真去寫一篇睇完電影嘅觀後感

“再見UFO”其實喺2018年5月就開拍，同年拍好，我好慶幸喺2019年10月亞洲電影節，朋友帶埋我一齊去睇首映，所以呢部戲，其實我8年前已經睇過。

當時覺得部戲幾好睇，但未有好特別嘅感動，點知喺不可抗力嘅因素下，呢部8年前嘅電影已經變成都市傳說，我冇諗過等到今年2026年，部戲終於可以上映。

好老實啲劇情我都唔記得哂，但2019年同我一齊有幸睇過首映嘅業界傳媒朋友，今日大家再睇返同一部電影，我哋全部都好大感受，究竟呢8年發生咗咩事？係咪呢8年，呢部電影同香港一樣，都經歷咗好多變化？

以下開始我會有極少量劇透，如果打算睇嘅朋友可以考慮睇唔睇埋下面嘅觀後感。

我印象中部戲開場無耐，就有一句畫字幕，大約係咁：「可能你而家身處緊嘅時代，就已經係最好嘅時代。」意思係唔係呢個世界或者香港只會越嚟越衰？稍後我會有我自己嘅見解。

8年之後再睇返，我竟然見返一啲似曾相識嘅臉孔，8年前佢哋可能只係一個臨時演員，或者你連佢個樣都未必會認得，例如阿卵，即係夜王果個土地，當時正義迴廊佢都未怕，仲有黃定謙，即係而家每晚都會睇到佢同阿佘果個念慈庵喉糖廣告，早幾年佢已經係viutv劇集嘅男主角之一。鄧智堅，佢都係喺幾年前攞到tvb最佳男配角，而新聞女王飛爺一角，普羅大眾已經認得佢。而以上呢三位，只係喺“再見UFO”中同阿sa有一場見工戲咁大把，得一兩句對白嘅特約演員。繼續你會見到喺星爺嘅戲會見到佢但up唔到佢個名嘅演員，李尚正，今年終於喺“金多寶”擔正做男一，戲裏面有一個好搶眼嘅特約演員，佢除咗肥真係無記憶點 ，如今佢已經係香城映畫一姐阿霞。仲有當時你如果唔係行內人 都必會識佢哋嘅朱康 梁雍婷，都喺呢8年間奪得金像獎最佳男配角及最佳女配角，衛詩雅大家一定認識，佢亦憑“破地獄”奪得最佳女主角，睇番8年前佢嘅演出，已經係爐火純青，所以已經率先喺導演會憑“再見UFO”奪得最佳女配角。大家認為佢身份係歌手多過演員嘅杜德偉，喺“再見UFO”都演得恰到好處，今年佢都憑“風林火山”率先喺導演會奪得最佳男配角。

所以戲中所講，我哋而家已經處於最好嘅時代？係咪之後一定會更差？就我以上提到嘅演員正正係喺過去香港電影最難捱嘅8年，憑著自己嘅努力同堅持，努力讓自己被看見，更上一層樓，所以香港係將會輸到貼地定係能夠絕地反擊？就真係要睇你信唔信。

部戲裏面所指嘅UFO，真係有人親眼目擊過，但亦有好多未見過嘅人認為UFO並不存在。電影中一班細個親眼見過UFO嘅小朋友，求救時大叫mayday mayday，直到時代巨輪碾壓下，可能佢哋都已經忘記懷疑自己親眼見過UFO嘅事實，我好同意影評人艾力喺佢youtube channel所講，呢部戲小朋友當時嗌緊mayday mayday，想救嘅可能係20年後已經踏入社會，學會妥協收起菱角，委曲求存已長大成人嘅自己。

再見ufo究竟係講我哋要同童年嘅自己說一聲再見，定係我哋會再一次見到童年時候嘅自己？導演沒有給予答案，但係我散場後我喺戲院洗手間廁格裏面喊咗10分鐘，雖然我未親眼見過ufo，但係睇完之後我再次見返當時十歲嘅自己，我好想同細個嘅自己講聲對唔住，我而家未做到細細個時候你最渴望欣賞期待嘅嗰一種人，但呢部戲話畀我哋聽只要一日未完一日都要堅持相信。

呢部戲絕對係一部最佳電影，所以喺導演會，電影評論學會都攞到最佳電影，最佳導演獎項，但係最佳電影叫好未必叫座，因為如果唔係出生於70年代80年代，你唔唔會知咩係call機，咩係他媽哥池，咩係neway，咩係牛龜咁大部電腦，咩係56k上網，相反睇早場嗰長者可能呢部戲嘅演員都唔識，劇情亦未必係佢哋杯茶，可能最有感受就係30至50歲嘅呢班觀眾群，我希望好戲真係有好報啦。

當所有大導演返大陸搵食嘅時候，呢部戲嘅監製錢小慧，同埋佢同學陳慶嘉，仲有以前一d拍小品好好睇嘅導演阮世生，佢哋都堅持以香港電影為根基，所以我同好多影評人一樣覺得已經好耐冇睇過呢一種香港愛情又好溫情又好嘅小品，而家要睇一部完全唔需要理會大陸市場純粹招呼香港觀眾嘅戲十分之難，希望大家珍惜。

老土講句，可能徐天佑黃又南之後都冇機會再見，而家擁有嘅一齊，不是必然，香港電影加油。