【時評人或KOL就當然下巴輕輕】史健仁

 

史健仁

20260303

【時評人或KOL就當然下巴輕輕】

近日見到有反侵及親美國民主黨嘅黃絲KOL係度批評侵侵欠缺出兵理由，我係搖晒頭。

美國同伊朗並非第一日進行核談判，聯合國要求伊朗控制鈾濃縮技術嘅生產濃度，來來回回已經傾咗幾十年。幾十年嚟，聯合國同伊朗開過唔知幾多次會，四方及六方會談都開過，大家簽過唔知幾多份聲明，協議書，備忘錄及條約。伊朗知道聯合國裡面幾乎全部都係國際法極端主義份子，加上伊朗初初技術未發展成熟，所以早期伊朗係聽話，（表面上）放棄將部份鈾元素提煉成高濃縮縮，但暗地裡不斷提升鈾濃縮技術。

東窗事發後，伊朗就被制裁，然後伊朗就學左翼自由派咁賣慘，成功打動奧巴碼及拜登。前者找返一條幾十年前嘅舊數，而拜登就仲勁，無啦啦解凍伊朗係歐洲嘅資產，等伊朗可以拎返一大舊錢。

伊朗經濟差係事實，但只係伊朗平民受苦，個班穆斯林及軍隊一個二個肥滿腸肥。伊朗一直暗地裡不斷提升自己嘅技術，所以而家大家都見到，伊朗有鬼死咁多導彈可以周圍射，導彈嘅產能強到不得了，而佢哋嘅無人機攻擊技術又冠絕中東。聯合國以為自己嘅制裁好有效，但實際係伊朗根本冇弱過！

扮嘢抄到2025年，大家就發現伊朗原來已經掌握到高濃度嘅鈾濃縮技術，裝備大量離心機，只差少少就做到核彈。去年年中美國炸過一次伊朗其中一所核設施，但未能完全摧毀伊朗嘅核生產設施。呢個時候，就要下一個重大決定：開佢波！

開伊朗波呢個決定，並非侵侵上任後先有，聯合國一早就傾過，敗登任內亦傾過。根本大家一直都想打柒伊朗，只不過由於風險巨大，冇人夠膽落注咁解。之不過，世事好似冥冥中有主宰，2025年各方面都出現有利於美國出兵伊朗嘅因素：

1. 俄羅斯陷於俄烏戰爭，而烏克蘭一直唔肯就範，要繼續打，所以俄羅斯好難抽到手幫伊朗（大家而家應該明白點解侵侵突然係去年下半年冇再迫烏克蘭割地啦）；

2. 好衰唔衰，日本出咗個修憲派嘅高市早苗。如果中國高調出兵支持伊朗，咁高市早苗就可以借中國威脅論加速修憲。另一方面，加上侵侵四月訪華，所以呢個時候唔可以出兵支持伊朗，要保持低調；

3. 阿妹內衣血腥鎮壓抗爭者，屠殺成千上萬嘅伊朗學生及平民，好多伊朗平民都曾公開要求侵侵幫忙，所以今次係出師有名；

4. 成功解決馬杜羅之後，美軍士氣爆晒bar。而家開伊朗波，美軍嘅表現一定最高；

5. 共和黨係美國國內因ICE執法問題而被千夫所指，要轉移國民焦點，最好嘅辦法就係製造外部矛盾，甚至係危機；

6. 伊朗陷入經濟危機，民不潦生，反抗力最弱就係呢一刻；

7. 中國向伊朗購買平價石油，伊朗可以話係中國能源供應嘅後花園。如果截斷呢個後花園，中國就要向邊個買石油呢？

兩年後總統大選，侵侵能否連任都未知。如果係民主黨當選，就唔使旨意可以出到兵，美軍士氣會低落，伊朗核問題又係返回係傾傾傾，開會開會開會嘅磨爛席時段，然後伊朗係表面神功戲之下就成功製造核彈。只要伊朗成功製造核彈，第一個就係隊美國（因為離自己比較遠）。大家今日睇得好清楚，伊朗係連朋友都照打，所以佢哋絕對唔會怕攪炒。只要佢哋製造到核彈，到時一百個聯合國，每日講一萬次國際法都冇用。

錯過今次先發制人嘅機會嘅話，要幾時先會出現咁多有利因素，要問上帝先得。因此，呢個絕非先搵原因然後決定行動嘅考量，而係如果而家唔行動嘅話，到時就唔使搵原因，而係搵棺材。所以我想問個班呢幾日係度嘈侵侵冇原因攻打伊朗嘅人：如果而家唔出兵，你哋會提議乜嘢處理辦法？召開三方四方六方八六會談，到安理會傾，簽一堆協議，blablabla？你用乜嘢打賭伊朗係傾傾傾開會開會開會期間 "唔會" 成功製造出核彈頭？

普通人冇人冇物，一條友係網上面吹水，當然會下巴輕輕，講下原則及國際法，又講下道義及華麗身影，但而家係一國元首做決定，係牽連住幾億自己人嘅命運。如果賭輪咗，伊朗真係係傾傾傾期間成功製造到核彈嘅話，咁第一粒核彈就係自己個仔或孫食。係咁嘅思考之下，身為一國之君根本冇可能會賭伊朗未來唔會製造到核彈！！！

其實聯合國應該一早就戒除國際法原教旨主義，一早睇穿伊朗嘅狡猾，自己親身係戰場上確認核設施嘅摧毀，而家先出兵根本就已經遲。