1：長和沽清中國以外地區碼頭業務，令1號仔今日裂口大升。冇計，單刁太靚。先講銀碼，交易扣埋欠債，可以套現190億美金，相當1478億港紙。呢個銀碼，亦即係等如尋日一間長和嘅市值（今日已經唔止了）。
3：講到最觸目一點，當然係巴拿馬運河兩個碼頭業務。事關特朗普上任以來，日嘈夜嘈「我要收返巴拿馬運河，條河我哋起嘅，你點可以俾咗中國？」於是不停向巴拿馬施壓，巴拿馬亦買佢怕，真係想打官司，取消原本批俾長和嘅碼頭經營合約。
4：點解特朗普會咁講呢，其實就好直線嘅。巴拿馬有5個碼頭，和記港口就佔兩個，仲要喺河嘅一頭一尾，可以話係最關鍵嘅兩個。根據巴拿馬海事局數據，2024年通過呢條全世界最重要運河嘅貨輪，有39％都係由和記碼頭處理。至於另外三個碼頭，就係分別由台灣、新加坡、美國巴拿馬合營去run。
咁特朗普一直以來個說法係：長和＝香港資本＝中國資本，然後就演譯成「OMG！巴拿馬運河俾中國控制住！」係冇證據嘅，但Trump佢就係咁camtrulia（監粗嚟啊），巴拿馬運河變「奈你唔河」。
5：咁緊張條運河，我呢度就唔由軍事角度出發，純在商言商。依家全世界最依賴條河嘅國家，就係美國。2024年全年，美國船舶使用運河佔近75％，排第二就係中國，佔21％，所以條運河唔可以有咩閃失。
6：運河對全球航運好緊要，但以2024年上半年計，貢獻長和少過1%嘅EBITDA，仲要係咁俾Trump針對住，所以係kick嘅。咁點解今日長和可以如此絲滑地，就甩走呢個燙手山芋？可以睇吓唔同外媒報道。
《金融時報》引消息指，「特朗普一贏，就開始話要吞併加拿大、格陵蘭，仲有巴拿馬運河，令巴拿馬方面開始受壓。咁長和嗰邊都覺得，呢單嘢會變成政治麻煩，所以決定要做啲嘢。」
然後《紐約時報》引消息人士，話李氏講到明一定搵美資買家，單刁有四個財團想爭；而BlackRock財團同長和高層，其實只係幾個星期前先開始傾，最後BlackRock贏咗。
《華爾街日報》又話，長和本來考慮過，一旦碼頭業務俾人拎走，會硬碰硬，用法律手段處理，但後來BlackRock開個價實在太吸引，根本冇得唔賣。消息人士話，「李氏家族最唔鍾意拖泥帶水，It was a very elegant solution。」
《金融時報》今晚再跟進報道，今次談判，係由李嘉誠本人親自領軍，加埋李澤鉅同買家埋枱傾，所以單刁可以話係李嘉誠出山！親自主理！
7：話單刁係elegant絕不為過，因為只係做一單刁，就成功四兩撥千斤，做到一石N鳥四贏效果。
對特朗普：美資拎返兩個最重要碼頭，同時顯示「美國優先」可以為美企帶來好處
對巴拿馬：封印「中國控制運河論」，令美方向巴拿馬施壓時，少樣嘢講
對長和：今次靚價甩晒之餘，仲唔使再做呢壇政治角力磨心；而你唔知嘅係，佢哋依家點分析航運業前景。
對BlackRock：BlackRock CEO，之前因為鼓吹公司要搞好ESG，所以俾好多保守派議員攻擊。就喺最近幾個星期，BlackRock都睇Trump面色做人，放棄 ESG 同埋DEI（多元、平等、包容）政策。今次真金白銀買兩個碼頭，變相喺特朗普手搶返分。
8：好啦，長和套現190億美元cash後，公司直頭錄得淨現金，拎住咁多錢做咩呢？派特別息嗎？
睇往績，長和系不時都會賣野，但對上一次賣完嘢exit，係會派返啲俾股東，已經數到2014年和黃賣屈臣氏25%股權，套現440億，全數派返息俾股東；至於再上一次係1999年科網熱時「賣橙」。
當年以198億英鎊，賣走Orange 44.8%股權，創香港開埠以來最大金額單一交易紀錄，同時為集團貢獻1130億港元稅前盈利，之後仲10送1紅股。依家澤鉅揸莊，佢計數真係唔會死錯人嘅。
9：又話時話，講開套現拎cash，除咗長和系誠哥、鉅哥，股神巴菲特投資旗艦「巴郡」，至2024年底，手頭上持3,340億美元現金、創紀錄新高。
沒有留言:
發佈留言