「美國唔再認同呢套邏輯。」

Goodbye HK, Hello UK

20250430

之前無論JD Vance或者Elon Musk都極力批評歐盟同英國言論自受侵蝕，損害美國人，講嘅都係現況，上星期Marco Rubio終於講點解，原來背後係同一個成立咗十幾年，專門「滅聲」嘅國務院部門有關。

上星期Marco Rubio接受網媒訪問，話十五年前為咗阻止極端宗教同ISIS响網上煽動恐襲，當時嘅政府响國務院成立咗部門。不過去到2016年，美國社會開始擔心外國干預選舉，所以呢個部門就加強監控網絡訊息。但遇過多幾年之後嘅2020年，呢個部門已經唔止針對恐怖分子或者外國代理人，而係針對美國人。

Marco Rubio話當時，國務院資助一啲自稱中立嘅NGO，然後實行所謂打擊假資訊計劃，實際上係做政治審查。當中包括大家可能聽過，話Donald Trump同佢嘅支持者講野方式好似俄羅斯特務或者恐怖份子。而呢啲NGO會標籤同打壓保守派人物，再將佢標記成外國代理人。

佢簡單咁形容成件事就係用美國納稅人嘅錢，經國務院再比啲NGO打壓另一班納稅人。講緊嘅唔係唔止係標籤咁簡單，啲人係真係被封Account，斷晒傳播渠道，基本上完全係政治操作。

更離譜係，上年Donald Trump上台之後，政府其實已經解散咗呢個部門，但Marco Rubio發現有人將呢個單位改名，搬去另一個部門繼續上面嘅操作。所以Marco Rubio話今次會徹底拆咗成個部門。下一步就係要公開當年成個審查計劃嘅來龍去脈。唔止要講，仲要寫低、有記錄、有證據咁比受害人平反，二來防止同樣事情重演。

咁關歐洲咩事呢？佢話依家啲西方國家，居然因為人講某啲野就拘捕人、唔俾入境，仲有可能罰款——呢啲係同美國根本理念相違背。當美國曾經出錢支持一套掛名「打假資訊」實際打壓異見嘅規則，外國政府就覺有正當性去做類似嘅嘢，立法打壓異見，今次拆屋就係對呢啲國家提出一個信號：「美國唔再認同呢套邏輯。」