【戰役：前所未有地逼真嘅戰爭電影（82/100）】史健仁

 

史健仁

20250418

【戰役：前所未有地逼真嘅戰爭電影（82/100）】

《戰役》冇故事主線，冇明確主角或配角，冇CGI，冇特效FX，冇兄弟情，冇感情線或床戲，冇人物背景，冇角色塑造，冇深層訊息，冇政治主張要宣傳，導演純粹以接近紀錄片嘅手法，向觀眾展示海豹突擊隊一次係伊拉克進行軍事任務嘅過程。電影好短，只有90分鐘。呢90分鐘裡面冇大美國主義，愛國主義或雄性意淫，亦冇塑造任何戰爭英雄，觀眾會睇到美軍嘅失敗決策及懦弱，冇士兵想係戰場上變戰爭英雄或Rambo，只想盡快返總部。

乜都冇，咁觀眾係90分鐘裡面究竟會睇到啲乜？

觀影期間我有一刻係度問自己：演員洗唔洗叫到咁慘烈呀？我根本冇親身上過戰場打過仗，未遇過電影裡面嘅情況，我只會話佢嘅臨場感強到嚇人，佢比到我一種置身於噩夢嘅折磨感覺。因此電影到中後段期間，有一刻我想電影快啲完，因為個種受折磨嘅感覺真係唔好受。睇過《戰役》之後，之前睇過嘅戰爭電影瞬間變成中學生集作或主旋律煽情宣傳片。

亦由於《戰役》嘅臨場感實在太可怕，所以觀影期間我腦海湧出一個我睇電影以嚟從未浮現過嘅學術性質疑：呢個究竟係Youtube上面睇到嘅Go-Pro拍攝得嚟嘅前線戰爭片段，定係經戲劇化處理過嘅電影？如果電影冇故事冇角色，過程同真實世界極端接近嘅話，佢仲算唔算係一部電影？

唔好等OTT，亦唔好諗住用電腦或laptop睇《戰役》，你必須係電影院嘅幽閉環境內，透過大銀幕先會體驗到《戰役》獨有嘅臨場及痛苦感覺。如果好奇或感興趣，就趁電影未落畫前趕快買飛入場。

如果年尾要進行電影盤點嘅話，《戰役》會有機會晉身最後十強。

（82/100）