《臨時劫案》原來幾cult!
睇trailer以為是瘋狂鬧劇，本來沒抱什麼期望，但睇完直至credit roller都出完，所有觀眾（雖然人唔多，只有幾個！）都無離場，似乎都在想：佢想講咩？
不是不明白，而是：咦！佢有嘢想講！
不太知道這位導演麥啟光的背景，Google之後只知道他導演過幾部不太知名的電影，包括《新流氓醫生》、《毋. 忘我》，比較出名的是與馬偉豪聯合導演的《玉女添丁》；不過沒見名字的「執行導演」作品卻有《奪命金》、《盲探》、《毒戰》、《單身男女2》、《七人樂隊》…… 即是杜琪峰班底，那就明白為什麼《臨時劫案》「很杜琪峰」！
有盧海鵬、林雪已經很有「峰」味，這個臨時劫案的錯摸、荒謬就很PTU，連配樂、攝影、取景都「很杜琪峰」！然而這次「很杜琪峰」沒有變得討厭，反而因為它的隱喻，說出了今日香港人的景況，我原諒了它的臨摹！
=====================小心劇透===================
今日香港「由治入興」，又是國際金融中心--遺址，無論你以前有幾醒目、幾好人、幾狠辣、幾克勤克儉，社會已經逼到你無路可逃。一向不是大奸大惡、最多只是蠱惑、縮骨的香港人，就算連親戚朋友都不放過，你呃我、我呃你都不足以撐過越來越窮、越來越壓抑的生活，特別廢中又不諳科技、財技，忍無可忍之下，不如就打劫搏一鋪！
戲中所有角色都是典型香港人性格或有典型遭遇--林家棟是蠱惑縮骨、任賢齊是「好人做唔好、壞又壞唔到」；林雪、姜大衛、姜卓文是蠱惑、食腦又無恥；胡定欣、鮑起靜、盧海鵬有婆媳、夫妻問題等等，唯獨郭富城的哨牙悍匪是一個半超現實的角色，他來自越南，為了生活來香港打劫，想得到三千萬回家鄉買大屋安居樂業。
說這角色是半超現實，是他既強悍兇狠，但又非常有禮貌、講原則，似是暗喻一個本來有修養、有能力的人，為世所逼才走上街頭做壞事！想通了這個暗喻，劇情便不胡鬧，黑色幽默隨之而生；直到梅藍天說：「我都唔想㗎！」我甚至感動過！
要讚的還有所有香港、香港人與香港人情味的特色，都描寫得很精到；所有選角都精妙，而且演出到位；尤其郭富城、姜大衛、梁仲恆今次的角色跟以前的有很大反差，都演出跟以前不一樣的感覺，好好睇！連最擔心的胡定欣、張可頤，都沒有一點大台味，看得舒服，有點邵美琪落在杜琪峰手上的感覺。
#臨時劫案 以為係一般三傻大鬧乜乜乜、烏龍打劫得個吉，之類喜劇。事實一開局家棟、林雪「死黑的」；鮑姐、胡定欣「玩曱甴」，完全符合瘋狂搞笑片類型。
直到哨牙阿王出場，廟街劫找換店一幕，筆鋒一轉，有街頭激烈鎗戰，有賊車瘋狂駕駛，有爆破有中鎗有流血有死人，完全係地道港產警匪片格局。喂！搞咩！
城城嘅哨牙造型只係沖淡戾氣殺氣嘅包裝。家棟嘅笠水、小齊嘅冇用輝，係貼地都市小人物嘅設定。故事其實講小巿民小人物受盡生活壓迫，小男人為養活家人，對社會作出嘅反撲。
「我去打劫，你打劫我，唔啱數」
故事劇情亦有銀河作品對荒謬現實控訴嘅味道。
完場後搜尋資料，原來導演麥啟光，編劇陳偉斌，都係銀河嘅班底。
麥啟光副導或執行導過杜sir 嘅《奪命金》、《毒戰》、《盲探》。
陳偉斌編過《單身男女》、《毒戰》、《盲探》、《神探大戰》。
兩人加埋，難怪本片出嚟有咁強烈銀河系風格。
近幾年杜sir己等如停產，而佢嘅弟子似乎己成熟，喜歡/想睇杜sir風格電影，似乎可以寄望佢旗下嘅接班人。
沒有留言:
發佈留言