【控制一下自己嘅性慾啦】史健仁

 

史健仁

20250819

【控制一下自己嘅性慾啦】

根據東莞網民嘅回應，作為當地人佢哋未飲過乜鬼觀音山水，亦未聽過或見過「鑫鼎鑫」個牌子名，係超市亦冇見過呢個牌子。咁大個香港政府，居然會選用大陸名不見經傳嘅雜牌公司出品，佢哋都覺得好奇怪。

東莞網民真係一語中的。

為咗節省成本先會搵大陸貨，係普遍香港人嘅觀念。由於觀音山水嘅單價係高過誠哥蒸餾水嘅單價，所以香港政府轉飲用水供應商並唔係因為誠哥啲水貴，亦唔係因為誠哥啲水即將停產，而係純粹想有錢都唔比誠哥賺。

係香港居住，對於香港政府會表忠呢種接近常態嘅行事作風，係見怪不怪嘅。香港政府要轉用好多大陸嘢，香港人亦都預咗。之不過，如果你轉用一啲係大陸都好多人用嘅大牌子，咁香港人就算要嘈，都會細聲啲。好可惜，香港政府偏偏搵一間當地人都未聽過嘅雜牌公司嘅出品。

為咗討好大陸政府，單價居然唔平，而且仲唔係比大陸大品牌，反而係比大陸豆泥雜牌公司做，非常奇怪。嗯，可能呢間公司係大陸嘅初創企業，裡面可能有一班潛質好高嘅青年，佢哋透過AI，超導體及納米技術，開發出一套人工智能嘅自動淨水系統。香港政府將合約交比佢哋，有一部份係基於對大灣區未來科技發展嘅支持！

如果香港政府換供應商背後，係有一個有咁嚴肅嘅內涵，有咁遠大嘅理想嘅話，誠哥都唔會有聲出，我都會收聲啦。事實係，冇。

「可能真係有呢」OK，咁收到訂單之後，有冇做過due diligence？有冇打電話比東莞市政府，查詢過公司嘅商業或法人資料？有冇上去同公司負責人見面，睇過間廠嘅生產線？咁搵《東將西望》跟一跟，都有掛？

乜都冇。

當地人一見到個公司名就覺得奇怪，我見到公司名都覺得奇怪，今日傳媒公佈嘅合約上面嘅公司及電郵地址又係奇怪。咁多咁明顯咁奇怪嘅地方，香港政府就係睇唔到，而且即刻簽名科水。

會睇唔到，係源於一個男士嘅生理現象：下體充滿血個陣，如果身邊有紅姐嘅話，紅姐都會上！

基本上香港政府每次提到大陸，中共或中國，就會扯旗。一扯旗，人就唔理性。因此，成件事其實好簡單，就係當香港政府扯爆旗，係港口風波事件上要跟中共主旋律，咁只要落到誠哥面，就會獲得中共讚許。係呢個時候，港府身邊就出現鑫鼎鑫！鑫鼎鑫，就係紅姐！

呢副一提到中共，中國或大陸就精蟲上腦嘅欲求不滿格，全世界都見到。從各類叫雞騙案得知，緊火嘅男人往往係最跪弱嘅時候，好易會比人承虛而入。今次有「鑫鼎鑫」，下次會有另一個名嘅「鑫鼎鑫」。

最後重申一次，轉用大陸嘢並唔係問題，格價高亦唔係最主要嘅問題。最主要嘅問題，係香港政府再次因大陸而失去理性。清醒一下，控制一下自己嘅性慾啦，香港政府。