20241101
［3000字《邪Mall》觀後感］萬聖夜有人畀洋腸攬，有人睇女。而我選擇支持港片，睇呢套《邪Mall》，第一日上就睇！而我唔睇《焚城》，因為《邪Mall》短一個鐘，而我好忙。
1. 先講你最關心嘅嘢：係包唔到場嘅。居然有十丁八丁友睇。當然今次唔係巴倫紐，係屯門市廣場，好似係冇咁易包場嘅。又或者COLLAR有叫座力。
3. 仲有介紹返，鬼片入唔到大陸。賣去其他地方？「你咪撚玩啦」（＊）。所以呢套戲，先更加要本土觀眾支持。
TLDR：第一日上我就仆去睇，滿意未？又，呢堆橙色嘢（如圖），令你諗起乜？
4. 一睇個故事，都已經覺得：「扯，咪即係《生化壽屍》」！而《生化壽屍》後來都變咗一套cult cult地嘅片。
5. 但除咗兩套都係「死場喪屍」外，可能後生讀者忽略咗兩個共通點：首先，何來死場？經濟差嘛。另外，《生化壽屍》拍嗰時，正係香港電影仆到直嘅年代，同而家都有啲相似。真係靠你一年睇兩套扮支持本土，就含得撚了。介紹返，當年所謂「港片谷底」，但《生化壽屍》都仲收600萬。你估今次呢套戲，收幾多票房？更唔好講物價貴咗幾多。
6. （但當然，一年睇兩套，好過兩套都唔睇。而大把後來「忽然愛港片」嘅港女，當年係打撚死都唔睇港片嘅。呢樣嘢我寫過多次，當年約港女出街睇戲，女話「冇所謂你話事但我唔睇港產片」，嗰種優越感，絶對證明當年唔睇港片先係品味。同樣地，你當年聽廣東歌必定畀人恥笑，個撚個上選秀節目都係國語歌英文歌韓文歌。亦同樣地，當年入場睇本地波亦係畀人恥笑的。新一代免疫，但啲廢中後來點「忽然本土」，相當有趣）
7. （係架啦，我梗係要「鬥純正」。「唔係我當年睇咁多爛片為乜呀」。屌啦，個撚個口號又識講「你贏，我陪你君臨天下你輸，我陪你東山再起」，根本任鳩你up）（＊＊）
8. 《生化壽屍》拍於1998年，亞洲金融風暴。港片亦仆直，老翻嘅嘢（今日支持港片嘅廢中，當年當然係冇買老翻，當然係入戲院睇戲的。好似係）。呢套戲同好多嗰個年代嘅「Cult片」，例如《陰陽路》，《三五成群》，《墨斗先生》，《一蚊雞保鑣》之類，自有其時代因素。當然亦有啲好似《槍火》，《野獸刑警》，《柔道龍虎榜》咁，變咗經典。而as I wrote before，去到2002年《無間道》就係逆市下岳少大膽投資，最後算係「文起八代之衰」，象徵港片走出低潮
9. 關於嗰個年代嘅港片，吾友高天佑aka黃曉南嘅《蕭條Cult片爆炸力》一書有講。書並不是極之好（作者都同意），好大程度係作者自己一個紀錄，但可以作為了解呢個時代嘅一個起點。
10. 仆街，我寫到好似論文Literature review 咁
11. 一定要講：呢位作者當年睇港片，就受咗newsgroup上面一位港片之鬼影響。「你估下係邊個？」
＝＝＝＝＝＝＝＝＝
12. 講返套戲，睇簡介你已估到係乜格局。極低成本（鬼片特點），一個Mall拍晒。主要演員三大個，黑仔姜皓文同新生代楊偉倫實力演技，拍新人COLLAR嘅王家晴Candy．缺一不可
13. As said，科幻片係拍人性（真係fuck that 嗰啲「邊有人睇劇情」嘅智障），鬼片亦係拍人性，兼且指涉當下，例如《屍殺列車》係最好例子。
14. 拍商場咩？《生化壽司》拍過。近代嘅，《猛鬼三寶》都拍過。你想像到，必然係商場as a metaphor，代表個社會。《猛鬼三寶》直頭劃出腸，方死你唔明，影埋個香港嘅紀念品（好似仲係英殖添，「好大的膽子」）。甚至《陰目偵信》亦係暗指香港，守護佢乜乜柒柒。唔計商場嘅，連《七月返歸》都係暗指香港（唔係你以為「七月」係乜？）。
15. 講真，都有啲太多，太廉價。但originality is overrated，都係睇拍成點啫
16. 呢套你見拍一個遺棄咗嘅死場。老豆黑仔開DVD（定VCD？）舖，仲係以前武師，用意已極明顯。楊偉倫就風水佬，只係師傅要佢守在呢度，佢先守，根本都想走（移民？）。Candy就黑仔個女，外國讀書，返嚟拍返香港，「即係移英港人返杳港探老豆，睇下你死得未咁」
17. 呢類Message，不算新鮮，任鳩你對號入座。仆街，《明日戰記》都有人話好有港味啦。你爽就好。你失戀就聽乜歌都覺得講自己架啦。正如你暗戀人 stalk人，人地ICQ Status寫乜你都覺得係講你（而家應該叫Story）
18. 所以，都係睇拍成點。而呢套真係算係咁。
19. 最大優點：節奏控制得幾好。完整示範咗最基本嘅「三幕劇」。90分鐘戲，頭30分鐘舖排背景，人物性格關係。去到30分鐘，就開始有「鬼」 — 我數住的！故事矛盾出現。然後去到最尾30分鐘，你想像到嘅打喪屍逃出生天。係咁架啦。好基本嘅拍戲方法。
20. 但實在類似嘅題材，已經拍咗無數次。你真係可以上YouTube，睇返1988年嘅《猛鬼學堂》（或者第一集嘅《猛鬼差館》，雖然我鍾意《學堂》多啲）—唔係恃老賣老，但你發現真係影響咗N咁多年港產鬼片 — 我甚至大膽講句，《屍殺列車》都係咁上下嘅風格。唔係話韓仔抄襲，但啟蒙一定有。正如拍黑社會片，你點都受《教父》或《英雄本色》吳宇森影響 — 到頭嚟佢地又影響咗《無間道》或塔倫天奴，又影響之後嘅導演
21. 所以，就真係唔會玩得出乜嘢新花臣。但唔緊要的，咪正正常常睇套戲囉。黑仔講嗰句「痴撚線」，我十分開心！官方預告都有！（youtube.com/watch?v=s8mKpLMpTe4）
22. 佢亦在戲入面sort of 有講「條路自己揀，仆街唔好喊」 （意思係咁，唔係exact wordings），唔知會唔會又畀人放大做「金句」 — 你真係唔好笑。仆街，《明日戰紀》都可以金句啦
23. 唔講《猛鬼學堂》咁遠嘅。咁《屍殺列車》啦，老幼咸宜，個個睇過。你見打後，拍咗N套喪屍片末日片，都係咁上下嘅大套路，呢套亦冇特別破拍。亦冇問題，新手導演，唔好未學行先學走。
24. 至於結局，都唔怕劇透啦可？若果你估唔到結局嘅。「我懷疑你有冇睇過戲」。即使唔講主角都好，咁嗰個想上Candy嘅鹹濕師兄，當然要死啦 — 鹹濕嘅就必死，差不多係中外鬼片定律。
25. 你好少見個Final Girl（甚至差不多一定係女！）係性開放嘅女仔 —呢啲當然外媒有統計過！嗰啲「性女」，必然係女主角嘅朋友，必然會死。所以扑嘢真係會畀鬼燒春袋。
26. 結局邊個生邊個死，完全估到啦。「即係仔女移民畀人掉低咗在香港嗰啲，最後都要犧牲埋成就新一代呀」。但唔緊要，最後新一代回流守護啦，都收到個尾。
＝＝＝＝
27. 好似太多牢騷，著實我亦唔鍾意搞咁多對號入座時代背景。但你見出面啲人必定會係咁寫（定我太高估套戲有幾多人睇呢套戲？）。
28. 要講嘅係，啲演員真係演得不錯。黑仔楊偉倫不用講，Candy以處女作嚟講，都算相當不錯了（利申：非粉）
29. 而你真係同sort of「同類」嘅《釀魂》或者《陰目偵信》比，呢套戲實在好太多了，至少唔會在年尾爛片名單中上榜。當然你可以話我男性視角，鹹濕伯父，COLLAR就讚，鏡仔就唔讚。但《盜月者》我都睇得幾舒服的。《望月》我都睇到媽媽聲的
30. 我唯一最後悔係《12怪盜》— 唔係後悔睇咗（世紀爛片梗係要睇！），係後悔冇寫到文 — 但誰知道呢？如果我真係寫咗篇文，可能就滅咗版架啦。都呼應返《邪Mall》入面黑仔嗰句，條路自己揀嘛，咁咪得囉。
＝＝＝＝＝＝＝＝
31. Last thing，套戲一個商場拍晒，冇公費遊埠，演員亦唔會特別貴。我估唔少錢用咗在後期製作。
32. 但我冇法唔講，嗰啲喪屍嘅「橙色嘢」（如圖），真係有點……突兀。可能我諗多咗，片頭又講美軍，硬係令我諗起美軍嘅「橙劑」造成一堆畸胎（但呢個係越戰，戲入面講二戰日本佔略香港）
33. 堆橙色嘢，我開頭諗，覺得似我睇開人地擠黑頭嗰啲YouTube Channel。再諗，就覺得似大閘蟹嘅蟹膏 — 最後，我醒起係乜了：
34. 完全就係3M 嘅耳塞！
（＊）有機會詳寫。但半年前寫《九龍城寨》，我講一樣好簡單嘅嘢：港片大製作必定係要靠大陸票房，套戲唔靠大陸必定蝕仆街，說好了的合拍片累死港片。有真誠嘅朋友，覺得唔係咁嘅，覺得港片可以開拓「其他市場」。佢地肯定係好心又樂觀嘅，但借問聲，How？你一路屌香港係南深圳土共化，然後叫台灣人好似以前咁睇港片？唔好忘記，移咗嘅又好留低嘅都好，大把港人樂於不停踩低香港屌香港乜都垃圾 — 咁然後你覺得可以在「其他市場」有人好似睇韓片咁睇港片？You can’t have it both．正如我評韓流時成日講：韓仔國內國外上下齊心打飛機呢下嘢，絶對係韓流成功一大關鍵。我就真係冇所謂的，少啲人睇我多啲包場，不過做香港電影業嘅就多得你唔少。甚至都未講，香港拍得戲嘅，差不多某程度都係「建制」架啦。你要原教旨主義嘅，當然一律杯葛港片，「即係昂山素姬以前都叫人唔好去緬甸旅行」。又或者可以學伊朗咁，流亡導演拍嗰啲先係「真港片」— 而呢個genre亦會慢慢流行。只係，似乎短期內都好難成為商業主流，更唔好話養起香港啲電影人。你睇下半年嘅港片票房，就知「靠本地」「靠「其他市場」」會點 — 但當然，《破地獄》必然會好收得。不過，靠你一年睇兩套戲，就死得了。真係唔好咁多廢話，你問任何電影人，都係叫你入場睇就最大支持 — 你是可以屌的，狂屌都冇所謂，唔搞到其他人唔入場就得。但唔入場嘅，你點讚都係多撚餘。我好記得態仔（冇錯係嗰個態仔）當年諷刺啲網友：「套《打擂台》好似幾好睇喎，BT嚟睇下先」 — 絶對刻劃咗個時代面貌。不過我倒希望今次嘅討論集中返呢套戲 — 因為反正遲下我會正式寫呢個題目。得閒的話
（＊＊）一種常聽到嘅辯解，就係「咁當年啲港片/啲歌真係好撚唔掂嘛，垃圾又要撐咩。崇優呀」。Maybe，至少頭半我都冇乜反對。但，你搬到落本地波或任何運動，啲人就用另一種標準。「唔掂都要撐」，掂先出嚟撐嗰啲係投機主義，Glory Hunter，「君臨天下東山再起」乜柒。其實都係任搬龍門。不過我倒希望今次嘅討論集中返呢套戲 — 因為反正遲下我會正式寫呢個題目。得閒的話
月頭訂Patreon最抵！小心唔好用iOS app 訂
已經1500人 訂Ivan Patreon！（bityl.co/9CyV） comment 都有link
=====
Ivan金融Patreon ，比別人知得多。subscribe now（bityl.co/9CyV） ，可以睇返晒以前嘅文。金融嘢，港美市場評點，月費100港紙有找． 畀年費仲有85折
====
合作或工作安排請PM 或email ivankirsten@gmail.com
沒有留言:
發佈留言