20260612
《夜王》導演吳煒倫本身就係動作片迷，推介之餘，壓軸送上入場忠告，記得睇到尾：
//《火遮眼》，係黐線的。
實在太耐冇睇過一部打得咁狠嘅武打片。
好睇嘅打片，一定係打情緒，引發咗一個情緒，捉住嗰啖氣就一路殺落去。
少少穿橋，trailer有的，主角個女俾壞人捉咗，咪成部戲去救個女囉。
係，你聽就覺得又係呢啲，但個女俾人捉嗰場，你明知會咁發生，一樣睇到心痛肉痛，導演Kenji就係拍到嗰個力量出嚟，唔怕你知，知你都痛！
由嗰場開始你就會一路擔心個女落去。葉偉信導演講得好中，Kenji場場動作都當ending咁拍，第一場就咁堅，跟住點打？
跟住點打，你想像不到。
狠嘅程度，睇過咁多打片如我，都俾佢震撼到。係唔留手嘅狠，黐線，究竟個心有幾忿恨先可以打到咁。
武打片通常忠奸分明，因為就係要奸角奸到出汁，你個心俾佢燒住，先想睇主角快啲同我打撚死佢，呢個係睇武打片最痛快嘅感覺，情緒發洩的極點。
《火遮眼》係頭十分鐘已經燒得起你呢度火，跟住就一直殺到尾，痛快無比。
行家成日都講，睇一部打片，係會睇到好想打交的。
我覺得大家睇呢套戲時，真係唔好有任何騷擾到其他觀眾嘅行為，例如講嘢、開著手機，頂凳各樣。真係會睇到當場打你的。
沒有留言:
發佈留言