20260606
《He man 》影評
首先講聲唔好意思先，我係明白套電影同埋漫畫本身唔係叫《He Man 》，正確名稱係《MASTERS OF THE UNIVERSE 宇宙天王》，但我哋真係叫咗幾十年He Man改唔到㗎喇！話說尋晚同好多人一齊去睇新版電影He Man，其實真係好興奮㗎 ！一個徹徹底底嘅童年回憶，要知道係撞正我哋小學去到中學時代，真係日日返屋企追睇卡通，同埋我想講當年我真係買齊晒佢所有He Man出過嘅Mattel公仔！仲要當時喺尖沙咀玩具舖訂成座骷髏頭堡，結果全港斷貨，最終買唔到，所以退而求其次，買咗蛇山！後來過咗幾年後因為入咗教會，覺得要成熟啦唔可以玩呢啲公仔啦，結果我將所有係所有He Man公仔送晒俾當時嘅越南難民營啲細路！我啲朋友都成日同我講，若果當日嗰啲公仔你keep到而家，你發達啦！但係我想講個蛇山就算到依家仲係收埋喺我老竇張床嘅床下底，我諗我30年冇攞過出嚟啦，唔知而家變成咩樣，唔敢諗！
所以我哋呢啲童年情意結嘅人，琴日簡直就係進入時光隧道，將自己變成一個細路，好開心咁睇住呢個冬菇頭哥哥（不過依家新版冇冬菇頭）去打怪獸！真係好爽㗎，就成為我哋呢一代人嘅爽片，千祈唔好用正常地球文化嘅邏輯劇情去夾硬演繹，始終呢個係另一個宇宙星球世界嘅文化同邏輯，唔好咁執着！不過好感覺到呢次新reboot，電影公司有少少曬冷嘅感覺，不如慢返少少，唔好一次過推晒啲人物出嚟！其實可能好多女士唔明㗎，呢套電影就係男仔版我哋年代嘅Frozen，你哋女仔不斷大叫Let It Go！我哋男仔就會不斷舉起把劍大叫：「請骷髏頭堡賜我力量！」細個喺個窗口嗌唔少！
不過我同朋友都認為，成套戲最驚喜係臨尾竟然加插咗一段情節，解釋咗點解佢叫He Man！我當然唔可以喺度劇透啦，但真係解開咗幾十年嚟我哋嘅一個大謎團，亦解得幾好幾合理幾鍾意！
多謝電影公司邀請觀賞優先場！尋晚仲遇到有人扮成He Man去睇，轉頭擺條片俾你哋睇！
沒有留言:
發佈留言